6 Mönät spöter...

Unglaublich aber wahr - ich han gad müese feststelle das ich schowieder es halbs Jahr retour bin - und nie meh öpis gschriibe han. D'Ziit isch soo schnäll verbiigange und so schnäll isch s'wahre Läbe wieder los gange und ich bin scho wieder mitte drin. Nachdem ich heicho bin hani zerst emal überall ächli Asyl beatreit! ;-) Dänn isches losgange mit Wohnig und Jobsueche - was sich nöd als eifach erwiese hät da ich ja nöd würklich gwüsst han was ich würklich sueche.
Mittlerwiile han ich e super schöni Wohnig wo ich mich sehr wohl fühle, schaffe scho sit 3 Mönet wieder und au das gfalltmer sehr. Mis Läbe hät wieder en Rhythmus - so wie früähner und momentan isch das au guet so.

Zrugg im Schwiizerländle

Nachere lange und au ächli asträngende Reis bini au schowieder retour im Schwiizerländle. Am Samstig simer nachem Test no go ässe gange (fascht die ganz Klass) und aschlüssend hämer eigentlich no in Usgang welle. Da ich aber vom Fritig uf de Samstig scho nöd viel gschlafe han und de Samstig rächt ahsträngend xi isch bini dänn au rächt uf de Schnurre xi und han mi entschiede lieber no äs paar Stündli go schlafe zgah. D'Val isch dänn au mitzruggcho und nach langem rede hämer dänn doch no 2h schlaf gfunde. Am Sunntig isch nämlich d'Limousine eus am 4 go abhole cho (also eigentlich 3, will in Canada hätmer scho Ziit müese umstelle). Min Flüger isch zwar erst am 8i gfloge aber de Manu und de Stephan sind scho am 6.20 uf L.A. abfloge und da simer gad min ihne mit. D'AK, d'Sanne und D'Val händ eus au an Flughafe begleitet und dänn nochli gwartet gha bis ich han chöne boarde. Isch komisch xi schowieder müese Abschied znäh...
Und wieder zrugg dihei isches au komisch - also natürlich au schön zum wieder all mini Lüüt zxeh, aber eifach ungwohnt willi mi jetzt wieder mues iiläbe etc. Gester hämer gad Wiedervereinigung gfiiret mit mine Wiiber. Jetzt gahts dänn los mit Job.- und Wohnigsueche... Mal luege wases alles lässigs ume hät...

De Abschied naht

Also als ersts muesi gad emal säge das natürlich min Hund wieder uftaucht isch! ;-) Es isch tatsächlich Putzfrau xi wo ihn usversehe mitgno hät und dänn ischer ide Wöscherei glandet, wo de Frontdesk ihn dänn au schliesslich gfunde hät!
Usserdem hani au no Jasse glernt ide letschte Wuche, de Schieber!! Mir händ die ganz Ziit verbracht mit Jasse ime Pub, öb Sunntig oder Zistigabig - immer isch Jasse axeit xi und mir händ äs riese Gaudi debii gha!
Doch leider isch jetzt dänn fertig mit dem, i 3 Täg hämer Prüefige (sind scho alli rächt agspannt) und i 4 Täg gahts au schowieder hei. Ich freu mich einersiits würklich uu ufs heigah (vorallem willi nüme mag wiiter umereise, immer usem Koffer läbe isch nöd so mis Ding) aber dänn heissts au wieder: Zrugg is würkliche Läbe!! Ich hanmer im letschte halbe Jahr so viel Gedanke drüber gmacht zum usefinde was ich wett mache wänni wieder zrugg id CH chume - und bin kein Schritt wiitercho!!!

Wanted

Oh, bin gad zrugg vo de Schuel cho und bin schockiert xi woni i mis Zimmer cho bin: Min Hund isch nüme ume!! (d'Chatz isch zum Glück no da) Es isch de fründlichst Stoffhund wos gitt, süess wie nüt und sehr zuetraulich. Wer weiss, villicht ischer abghaue willer Striit mit de Chatz gha hät - also fallsen öper xeh hät, bin um jede Hiwies dankbar!
Mini letschti Hoffnig bestaht no das d'Housekeeperin ihn usversehe i Lihntüecher iigwicklet hät und er jetzt ide Wösch isch - d'Suechaktion lauft uf Hochtuure...

Jasse

Hüt hämer wiederemal en "Pseudo" Test gha - also mir händ en ganze lang die ganze Prüefige duregmacht wies dänn wird sii i 1.5 Wuche. Aschlüssend sind d'AK, d'Val, de Manu und ich no ines Pub eis go zieh uf das abe. (Ziitlich so 16.15h) Uf jedefall hämer dänn emal agfange bstelle. Irgendwänn hämer gfunde mer chönd ja afange Jasse - und da ich nöd han chöne Jasse simer dänn bim Arschlöchle glandet. Zwüscheddure natürlich namal s'eint oder andere bstellt bismer dänn bim "Geimsch" (wie schriibtmer au das?!) acho sind und nach es paar Gläser Wii oder Bier natürlich träne glachet händ willmer teilwiis "ächli" Fähler gmacht händ. Allgemein muesi säge ich han scho lang nüm so viel glachet wie ide letschte 6 Wuche, drum machemer morn nach de Schuel gaht wieder wiiter womer ufghört händ!
P.S. Womer dänn Bar verlah händ wärs dänn öpe 21.15h xi.... ;-)

Seattle

Das isch s'Resultat vomene würklich Hammer Weekend! ;-)Es hät alles demit afgange dasmer am Fritig Namittag am 3 uf de Bus sind - 4 Std. Busfahrt wo sich dänn ade Gränze nochli usezögeret hät. Ich han usnahmswiis kei Problem gha zum id USA iireise, aber defür alli andere vo minere Gruppe! So simmer dänn öpe am 8ti in Seattle acho und händ nacheme 15 Minütige Walk au gad üses Hostel gfunde: Green Tortoise. Es isch sicher nöd viel Luxus dehinder xi, aber für 2 Nächt häts glanget. Dänn simmer no schnäll en Happe go ässe und spöter scho gli is Bett. Leider han ich nöd würlich guet gschlafe und wie sich am nöchste Morge usegstellt hät, die andere alli au nöd würklich.
Samstig Morge simer zerst emal go Shoppe gange (was au suscht?!) Am Mittag han ich mich dänn mit de Sibel troffe gha (die andere sind mittlerwiile chli d'Stadt go erkunde) während ich gmüetlich chli ide Sunne gsässe bin.
Samstig Abig simer einisch meh go sehr fein ässe gange - Italienisch! Da mir alli rächt uf de Schnurre xi sind, simer dementsprechend au am 10ni schowieder zrugg is Hostel pilgeret. Eimal meh - eh meh oder weniger schlaflosi Nacht gha. Am Sunntig simer super fein go Zmörgele gange, Bagels, Pancakes, Toast, Orange Jus etc. - alles was das Herz begehrt. Nachher simer namal chli go shoppe, womer aber dänn au das wieder xeh händ simer chli an Pier gange und det wieder d'Sunne gnosse. (s'ganze Weekend hämer Hammer Wätter gha - troimli xi!)
Am Sunntig Abig simer dänn no äs NBA Spiel go luege: Seattle vs. Lakers! Super xi, bin ja zwar nie so en riese Fan vo Basketball xi, aber isch glich sehr interssant und spannend xi das emal Live z'erläbe.
Dänn isches schowieder zrugg uf Vancouver gange - womer dänn fängs am Morge am halbi 4ii acho sind. D'Lehrerin hät Bscheid gwüsst das dementsprechend öpe 5 Lüüt vo eusere Klass erst uf die Namittag werded id Schuel cho - so wiit so guet. Bin au brav ufgstande, han mich mit de Valerie und em Manuel zum Zmittag troffe und da s'Wätter eimal meh en Traum xi isch und mir nöd würklich motiviert für id Schuel, hämer doch churz und bündig entschiede am Namittag lieber ächli an Strand zgah. Dänn hämer de AK (churz für Anne-Kathrin) Bscheid gäh und sie isch mit eusem Plan nach churzer Überredig au iverstande xi. Uii, isch das en luschtige Namittag xi, mues jetzt schowieder lache wäni nur dra dänke. Und Sport hani au no gmacht zu allem ane (ja, ich han Sport gmacht!!) Also, je nach dem wiemers betrachtet, zum an Strand z'cho muesmer zerst ächli Stäge laufe (also dasmer eus richtig verstönd - nöd eifach äs paar Trittli, sondern RICHTIG VIEL!!), derab isches ja no gange, aber wos dänn as deruflaufe gange isch - ohohoh...
S'ganze Weekennd isch eifach unvergässlich xi, und demit ihr ächli en Iidruck händ hani agfange ächli Filmli z'dreihe! ;-)

Ohni Titel...

Ich mues würklich säge, Vancouver wirdmer je länger je unsympatischer! Ide letschte Wuche isch wiederemal eine verschosse worde (wieder guet bekannt bide Polizei wie letschtmal scho) und dänn häts au no e Explosion gäh, en Starbucks und en Taco Bell isch abebrännt worde (zum Glück kei verletzti).
Suscht isch gar nöd viel passiert, am Weekend bini rächt fuul xi, s'Wätter wär zwar perfekt xi, Sunneschii, aber ich han mich dänn entschlosse äs easy Weekend iizlege. Am Samstig - wie schier jede Abig - hämer en Film glueget gha. Ich bin ja vorher scho äs Fernsehchind xi, aber da luegi fascht jede Abig irgend en Horror/Psychofilm mit de Val, was natürlich au gad guet für euses English isch! ;-)
Nächst Weekend gömer uf Seattle und da druff freui ich mich riesig. S'letschtmal im Amiland go shoppe bevors dänn i 3 (!!) Wuche scho heigaht! Und usserdem werdemer es NBA Spiel go luege gah vode Lakers!

Montreal

So,äntli chumi dezue vo mim verängerete Weekend in Montreal z'schriibe. Leider isches schowieder verbii, aber fangemer doch emal bim Mittwoch aa. Nacheme ca. 4 stündige Flug bini dänn mit Ziitverschiebig am 5ii in Vancouver aacho und han Usschau ghalte nach de Herzt Autovermietig. (Da ich ja d'Info vo minere Schwöster becho han das die meh Informatione händ für mich) So, uf jedefall hani dänn müese durs Parkhuus laufe und ghöre plötzlich es "Hey" hinder mir, dreii mi um und staht doch prompt mini Schwöster dete! ;-)) Han ja soo freud gha! Mir händ eus dänn uf de Wäg zu üsem Hotel gmacht und sind dänn a dem Abig gli emal go pfuse gange - willmer beid nöd würklich 100% zwäg xi sind. Dänn sind 2 Täg shoppä axeit xi! ;-)) Und am Donschtig Abig simer anen Hockey Match gange: Montreal gäge Toronto. Leider hät Montreal natürlich verlore - wie jedesmal wänn ich äs Spiel gang go luege verlüürt natürlich mini Favorite Mannschaft. Aber es isch de Hammer xi, Stadion isch überhaupt nöd verglichbar mit dene us de CH, es händ 27'0000 Lüüt drin Platz und d'Stimmig isch gigantisch xi! Am Fritig Abig simer is Kino go "The Bucket List" luege, hani en super Film gfunde.
A üsem dritte Tag simer dänn in Stadtteil vom "alte Montreal" gange, det häts es Iisfäld gha und mir sind ächli go Schliifschüendle. (Also, mini Schwöster isch Rundene gfahre und ich bin langsam vor mich hiikroche!) Samstig Abig simer ines Swiss Restaurant gange (hmm..... fein xiiii) und aschlüssend is Casino - 5stöckigs Casino, unglaublich xi, nur leider nüt gunne! :-(
Ja leider isch dänn au schowieder Sunntig xi und mir händ eus beid wieder uf de Heiwäg müese mache. Ich bin dänn au sehnlist vo mine Gspänli erwartet worde im Hotel.

Gester hämer natürlich wieder Schuel gha - woruf mir all nöd würklich Luscht gha händ. Da de Manuel, Schuelkolleg, am Sunntig Geburtstag gha hät, hät die ganz Klass no äs Happy Birthday gsunge und üs beidne äs Gschänkli gäh!! Schotgläser vo Vancouver - han ja uuu freud gha!!!
Neuii Studente hämer au no becho - mir sind all nöd würklich Begeisteret xi das üsi herzig, super Klass no 4 wiiteri Lüüt bechunt - so händ d'Val und ich die churzerhand eifach "The others" tauft! ;-)

Es paar warmi Gedanke bitte....

Chönti nämlich guet verträge momentan - bin bereits zum 2te mal Chrank sitt ich in Vancouver bin und das heisst dänn öpis. Vercheltet bini ja jetzt scho sit längerem aber gester hani no Fieber becho, Kopfweh gha wie blöd und Gliederschmerze. Die lieb Valerie (wo sälber chrank isch) hätmer dänn gester Tablette gäge Chopfweh bracht - und alli womi känned wüssed das das öpis heisst wänn ich e Tablette nimme.
Eigentlich müest ich ja das Weekend grausam lerne und Sache ufhole da ich ja nächst Wuche 3 Täg verpasse ide Schuel, aber gester hani genau nüt gmacht. Nachher triffi mi dänn no mit de Val und mir händ vor eus gägesiitig z'motiviere demit mer nochli düend lerne. Nächst Wuche hämer nämlich scho die erst Testprüefig, de ganzi Zistig... Phuu, bin ja mal gspanne wie das usechunt...
Aber eigentlich isch das momentan alles halb so wichtig, will zerst freu ich mich jetzt eifach emal uf min Trip nach Montreal, wo ja jetzt scho sehr gli vor de Tür staht! ;-)

Kinoooo....

Mues halt scho säge - Amerika und Kanada isch eifach genial was Kino's abelangt. Es hät irgendwie 10 Film zur Uswahl, kostet nume 10 dollar und isch glücklicherwiis lediglich öpe 7 Gehminute vo üsere Unterkunft entfernt. Bin gad heicho vome Film mit es paar Schuelgspähnli, 27 Dresses, isch uu herzig und luschtig xi - sehr lohnenswert für all wo in erwägig zoge händ de Fim go luege zgah.
Eigentlich sött ich ja mittlerwiile am schlafe sii, morn isch schliesslich wieder lerne und ufpasse axeit ide Schuel....Bääähhh... Irgendwie isch die ganz Klass nöd so uf de gliche Wällelängi mit de Lehrerin, obwohl, ich chan mich ja nöd beschwere, Sie luegt sehr druff dasi au ja nöd zviel verpasse i dene 3 Täg wo ich in Montreal wird sii nächst Wuche - Juhuiiiiiii.... nur no e Wuche, die Ziit rast wie wild!!
Sust isch eigentlich gar nöd viel meh passiert am Weekend - usserd dasi ächli beschwipst xi bin am Samstig - wirde langsam alt, han au schliesslich scho sehr gli äs 25gi am Rugge!
Es macht au würklich uu Spass da ide Unterkunft - mer ässed meistens zäme - die lieb Valerie bechocht eus au immer uuu fein - und au suscht hämers uu luschtig, lauft uf jedefall immer öpis da.
Momentan schneits gad wie wild (was in Vancouver Downtown nöd soo üblich isch) Isch schön wämer usem Feischter chan luege aber es pflotschet au ächli dusse, wie ide CH, hami gad dihei gfühlt womer heigloffe sind! ;-)

New Blog

I created for all English speakers a new blog - just press on the left the link to the English Version - on this way, everyone can read my blog - the English speakers and the Swiss German speakers.

Also, uf dere Page wird ich wiiterhin uf Schwiizerdütsch schriibe - am meiste für Pfide - vo ihre weiss ich das Sie min Blog glaubs am meiste duet verfolge. Und so wärs nöd fair gägeüber allne wo nöd guet Änglish chönd dasi die eifach nüm duen ufem laufende halte. Für alli wo gern ächli English wännd läse, hani uf de linke Siite en Link "English Version" errichtet.

Tipsy?! No, not me...

First of all, thanks to my dear Val, to her lovely comment! I really appreciated it! Now, I'm sitting in my room, after a loong evening of drinking wine - the others are on their way to a pub (except poor Sanne, who is sick today) and of course me. Damn, I'm so getting old - not to mention that I'm still tipsy. I really hope the others will have some fun tonight. More tomorrow or so, I'm off to bed...

Grouse Mountain

A very nice Swiss student who just read my blog wrote me a message through the MSN messenger that the mountain calls Grouse Mountain. (The one I forgot the name about it) Thanks Manuel! ;-)

Let's try it in English

I decided to give it a shot - I mean I've met so many people who doesn't understand the bloody Swiss German so it's just fair to write something in English.
I might screw up in this whole English blog, but I actually don't even care. It's a good exercise for me and even if I make a lot of mistakes, who cares?! I mean I'm always glad about your comments and corrections - just do it! ;-)

I just came back to my room after chatting with other students (Anne-Kathrin CH, Val French CH and Sanne from Holland) from my school - we ate dinner together and afterwards we went to our TV lounge in our hotel, drinking some wine and chatting some more. It was a lot of fun hanging out with these people and tomorrow we planned to go to a mountain (I totally forgot the name) and the other girls will do some snowboarding and I just gonna enjoy the view and the après-ski.

I know already that the main problem about blogging in English will be that I'm not gonna write that much as usual, because it's a lot harder to express yourself in another language. Bummer... Good night!

Dangerous Vancouver

Am Samstig Abig sind vor eusere Schuel 2 Lüüt verschosse worde. (Vor eusere Schuel!!!) Isch natürlich s'Gspröchsthema Nr. 1 xi hüt, en Schuelkolleg isch sogar gad um de Egge gstande wo's passiert isch. Es isch irgendwie e Verlobigsparty xi vo eim wo gad usem Knast cho isch und wo de Polizei dementsprechend au rächt bekannt xi isch - uf jedefall mueser jetzt nie meh is Gfängnis - ihn und glaubs sini Verlobt oder en Kolleg (da drüber wird nochli spekuliert) häts nämlich verwütscht gha. Wer genau de Täter xi isch weissmer glaubs au nonig. Isch ja nöd grad ermuetigend - vorallem isches fängs öpe 10ni am Abig xi wo das passiert isch - also no e einigermasse christlichi Ziit zum underwägs si. Aber gemäss eusere Lehrerin isch das also scho nöd so alltäglich das das in Downtown passiert, was mich jedoch nöd würklich beruhigt gha hät...